Gure herriaren etorkizunaz hausnartu eta erabakiak hartzeko prozesua abiatu genuen martxoan. Soraluze biziberritzeko oinarri berriak jarri nahi ditugu prozesu honekin. Alkarrekin Soraluze Eginez da bere izena eta maiatzean hasi eta azarorarte hilabetero gai bat izango dugu hizpide. Ingurugiroarekin hasi, ongizate, kultura eta kirola, garapen ekonomikoa, hezkuntza eta euskara landuko ditugu. Gai bakoitzarekin bi bilera egingo ditugu. Hilabete bakoitzeko 2 asteazkenetan egingo ditugu bilerak kiroldegiko zine aretoan arratsaldeko 18:30ean. Ondorioz herritar eta eragileei gonbidapena egiten dizuegu herriaren etorkizunaz jardungo dugun proiektu honetan parte hartzera.

PROIEKTUAREN BULTZATZAILEAK
Proiektu honek Soraluzeko Udalaren eta Debegesaren arteko elkarlanean izan du bere jatorria.

PROIEKTUA GARATZEAZ ARDURATUKO DEN ENPRESA
Proiektua garatzeko Mondragon Taldeko MIK ikerketa zentroaren laguntza izango dugu.

PROIEKTUA GARATZEKO BITARTEKO EKONOMIKOAK
Gipuzkoako Aldundiko Berrikuntzako, Landa Garapeneko eta Turismoko Departamentutik emandako 26.000 euroren bitartez finantzatuko da nagusiki proiektua. Soraluzeko Udalak ere 8.000 eurotako ekarpena egingo du.